ಗೋವಿಂದಭಟ್ಟರ ಕಾಲದ ಭೂದಾನ ಪತ್ರ ೩

ಮೋಡಿಯಲ್ಲಿ ಬರೆದ ಹಳೆಯ ಕಾಗದಗಳು – ೩   (ಗೋವಿಂದಭಟ್ಟರ ಹೆಸರಿನಲ್ಲಿನದು)

ಗೋವಿಂದಭಟ್ಟರ ಕಾಲದ ಇನ್ನೊಂದು ಕಾಗದ – ಚಿತ್ರಭಾನು ಸಂವತ್ಸರದ ಭೂದಾನ ಪತ್ರ ಬರೆದಾದಮೇಲೆ ೩೧ ವರ್ಷಗಳ ನಂತರ – ಪ್ರಮಾಥಿ ನಾಮ ಸಂವತ್ಸರ – ಶಕೆ ೧೭೧೫ ರಲ್ಲಿ ಬರೆದ ಜಮೀನನ್ನು ಇನಾಮ ಆಗಿ ಮಾಡಿಕೊಟ್ಟ ಮತ್ತೊಂದು ಹಳೆಯ ಕಾಗದ. ಪರಾಮರ್ಶೆ ಮಾಡಿ ನೋಡಿದರೆ ಸಂವತ್ಸರದ ಹೆಸರನ್ನು ತಪ್ಪಾಗಿ, ಪ್ರಮಾಥಿ ಎಂದು ಉಲ್ಲೇಖಿಸಲಾಗಿದೆ ಎಂದು ಅನಿಸುತ್ತದೆ. ಅದು ಪ್ರಮಾದಿ ಎಂದಾಗಬೇಕಿತ್ತು.  

ಶಕೆ ೧೭೧೫ ಅಂದರೆ (೭೮ ಕೂಡಿಸಿದಾಗ ಬರುವ) ಕ್ರಿ.ಶ. ೧೭೯೩ ನೆ ಇಸವಿ. ಮೊದಲ ಕಾಗದ ಬರೆದ ೩೧ ವರ್ಷಗಳ ನಂತರ ಬರೆಯಲಾದುದು. ನನಗೆ ಸಿಕ್ಕಿದ್ದೂ ನಕಲು ಪ್ರತಿಯೆ ಇರಬೇಕು. ಮೊದಲನೆ ಕಾಗದದಂತೆಯೆ ಇರುವ ಒತ್ತುಕರಡಿನಂತಿರುವ ಕಿರಿಅಗಲದ ಉದ್ದನೆಯ ಕಾಗದ. ಮೊದಲ ನಕಲು ಪತ್ರದ ಲಿಪಿಕಾರನದೆ ಕೈಬರೆಹ. ಅದು ಶಕೆ ೧೭೧೫ ಇದ್ದುದೇ ಸರಿಯಾಗಿದ್ದರೆ,ಲಿಪಿಕಾರ ಸಂವತ್ಸರದ ಹೆಸರನ್ನು ತಪ್ಪಾಗಿ ಬರೆದಿದ್ದಾನೆ ಎಂದು ಕಾಣುತ್ತದೆ, ಏಕೆಂದರೆ,  ಸಂವತ್ಸರಗಳ ಕ್ರಮದಲ್ಲಿ ೧೩ನೆಯದು ಪ್ರಮಾಥಿ, ೧೬ನೆಯದು ಚಿತ್ರಭಾನು. ೪೬ ನೆಯದು ಪರಿಧಾವಿ, ೪೭ನೆಯದು ಪ್ರಮಾದಿ (ಅಥವಾ ಪ್ರಮಾದಿನ್). ಚಿತ್ರಭಾನುವಿನಲ್ಲಿ (ಶಕೆ ೧೬೮೪) ಬರೆದ ೩೧ ವ₹ರ್ಷಗಳ ನಂತರ ಬರೆದುದು ಎಂದರೆ ೪೭ ನೆ ಕ್ರಮಾಂಕದಲ್ಲಿ ಬರುವ ಪ್ರಮಾದಿ ನಾಮ ಸಂವತ್ಸರ (ಶಕೆ ೧೭೧೫). ಆದರೆ ಈ ಕಾಗದದಲ್ಲಿ ಹೆಸರಿಸಲ್ಪಟ್ಟಿದ್ದು ಪ್ರಮಾಥಿ ನಾಮ ಸಂವತ್ಸರ.

ಈ ತಪ್ಪಿಗೆ ನಾನು ಮೂರು ಕಾರಣಗಳನ್ನು ಊಹಿಸುತ್ತೇನೆ. ಇನ್ನೊಬ್ಬರು ಮೂಲಪ್ರತಿಯ ಮಜಕೂರನ್ನು ಓದುತ್ತ ಅಥವಾ ಹೇಳುತ್ತ ಹೋದಹಾಗೆ ಲಿಪಿಕಾರ ಅದನ್ನು ಕೇಳಿ ಬರೆದಿದ್ದರೆ, ಪ್ರಮಾದಿ ಎಂಬ ಶಬ್ದವನ್ನು ಕಿವಿ ಪ್ರಮಾಥಿ ಎಂದು ತಪ್ಪಾಗಿ ಗ್ರಹಿಸಿದ್ದೀತು. ಇಲ್ಲವೆ ನೋಡಿಕೊಂಡು ಬರೆದಿದ್ದರೆ, ಕೈತಪ್ಪಿನಿಂದಲೊ, ಅನವಧಾನದಿಂದಲೊ, ಹೆಚ್ಚೂಕಡಿಮೆ ಏಕರೂಪದಲ್ಲಿ ಕಣ್ಣಿಗೆ ಕಾಣುವ, ಏಕ ಉಚ್ಚಾರದ ಧ್ವನಿಯಲ್ಲಿ ಕಿವಿಗೆ ಬೀಳುವ, ಈ ಪ್ರಮಾದಿ ಎಂಬು ಶಬ್ದ ಬರವಣಿಗೆಯಲ್ಲಿ ಕಾಗದದ ಮೇಲೆ ಇಳಿದಾಗ ಪ್ರಮಾಥಿಯಾಗಿರುವ ಸಾಧ್ಯತೆಯೂ ಇದೆ. ಇದೂ ನಕಲು ಪ್ರತಿಯೆಂದೆ ನನಗೆನಿಸುತ್ತದೆ. ಕೊನೆಯ ಕಾರಣ, ಮೂಲ ಕಾಗದವನ್ನು ಬರೆದ ವ₹ರ್ಷದಲ್ಲಿಯೆ ಅಥವಾ ಮರುವರ್ಷ ನಕಲು ಪ್ರತಿ ತೆಗೆದಿದ್ದರೆ,  ಲಿಪಿಕಾರನು (ವಿಷಯವನ್ನು ಬಲ್ಲವನಾಗಿದ್ದರೆ) ಚಾಲ್ತಿಯಲ್ಲಿದ್ದ ಆ ಸಂವತ್ಸರದ ಹೆಸರನ್ನು ಹಾಗೆ ಬರೆಯುತ್ತಿರಲಿಲ್ಲ. ಇದು ಬಹಳ ವರ್ಷಗಳು ಗತಿಸಿದ ಮೇಲೆ ಮಾಡಿದ ಕೆಲಸವಾಗಿರ ಬೇಕು.

ಇನ್ನು ಇದರಲ್ಲಿನ ಉಳಿದ ವಿವರಗಳು : ಶುರುವಾತಿನಲ್ಲಿ ಮೇಲುಗಡೆ, ನಡುವೆ ಬರೆದ- ಶ್ರೀ ಕಾರದೊಂದಿಗೆ, ನಂತರ ಒಕ್ಕಣೆಯಲ್ಲಿ ಕಾಗದವನ್ನು ಬರೆದ ದಿನ – ಜ್ಯೇಷ್ಠ ವದ್ಯ ದ್ವಾದಶಿ, ಗುರುವಾರ.  ಪ್ರಾರಂಭದ, ದೇವನಾಗರಿ ಲಿಪಿಯಲ್ಲಿ ಬರೆಯಲಾದ ದೇವತಾ ಸ್ತುತಿಪರ ಸಂಸ್ಕೃತ ಶ್ಲೋಕ ನಮಸ್ತುಂಗಿ ….., ಸಂವತ್ಸರ ಇತ್ಯಾದಿ……ಯಾರಿಗೆಂದು ಉದ್ದೇಶಿಸಿ ಬರೆದುದು ಎಂದು ವಿವರಿಸುವ ೮ || ಸಾಲುಗಳು ಇವೆ. ನಂತರದ್ದು ಮೋಡಿ ಲಿಪಿಯಲ್ಲಿನ ಬರವಣಿಗೆ ೧೦ || ಸಾಲುಗಳು, ಮತ್ತೆ ೨ ಸಾಲು ದಾನಪತ್ರಗಳಲ್ಲಿ ರೂಢಿಯಂತೆ ಬರೆಯುವ  “ಸ್ವದತ್ತಾ ……” ಎಂಬ ಸಂಸ್ಕೃತದಲ್ಲಿನ ಎಚ್ಚರಿಕೆಯ ಮಾತುಗಳ ದೇವನಾಗರಿಯಲ್ಲಿ ಬರೆದ ಶ್ಲೋಕ, ಹೀಗೆ ೨೨ ಸಾಲುಗಳು, ನಂತರ ಅದೇ ಕಾಗದದ ಹಿಂದೆ  “ಸ್ವದತ್ತಾ …..” ಎಂಬ ಭೂಮಿಯ ವಿಶೇಷ ವರ್ಣನೆಯ ೨ ನೆ ಸಂಸ್ಕೃತ ಶ್ಲೋಕದ ೨ || ಸಾಲುಗಳು, ಕೊನೆಯಲ್ಲಿ ದಾನ ಪತ್ರದ ಉಳಿದ ಭಾಗ ಮೋಡಿಯಲ್ಲಿ ಬರೆದ ೨ || ಸಾಲುಗಳು ಹೀಗೆ, ಆ ಪಾನಿನ ಮೇಲೆ ಒಟ್ಟು ೫ ಸಾಲುಗಳು ಇವೆ.

ಲಿಪ್ಯಂತರ

ಮೊದಲ ಪಾನು